Act 17 | MED | STEP | Wote, Pol Sailas raⱡ, Ampipolis kona ila pukᵾⱡ pendkᵾⱡ, Apoloniya pukᵾⱡ, wote Tesalonaika kona ila purᵾnggil. Kona ila Jura wamp kᵾⱡ nga atinga manga kel ti, murum ila purᵾnggil.

Acts 17

Tesalonaika Kona Ila Orᵾnggil

1 Wote, Pol Sailas raⱡ, Ampipolis kona ila pukᵾⱡ pendkᵾⱡ, Apoloniya pukᵾⱡ, wote Tesalonaika kona ila purᵾnggil. Kona ila Jura wamp kᵾⱡ nga atinga manga kel ti, murum ila purᵾnggil. 2 Pol elim ᵾndrᵾm mbila, itim uⱡ ni mel, atinga manga kel ila kuimp tepa purum. Kona ila mba moⱡpa, mowi kor rumbᵾⱡ raldika moⱡpa, wamp mbᵾ kᵾn, Got nga ik mong mat, Buk Wingti ila petᵾm mbᵾ, ekit tᵾpa, kundpa nimba. Wote, Got nga ik puⱡ mbᵾ, nimba mot ndupa, wu Mesaiya ei, mindil nomba koⱡpa, wote ⱡoporpa omba purum ik mbᵾ nga nimba, piral ndupa, ei mel nitim, “Enim puⱡ nimp ngunt wu ei, Jisas ei, Got nga ngurum wu Mesaiya,” nitim. 4 Ni kᵾn, Jura wamp mat ik ei, pilik mondᵾk pᵾtᵾng nimbᵾ, wote Grik wamp mat, Got nga mbi paka rondᵾk etmin nimbᵾ ok, Pol kᵾn Sailas raⱡ kᵾn kup etᵾng. Wote, wu nuim mbᵾ nga ambᵾmᵾl nimbᵾ, i ku etᵾk ok, kup etᵾng.

5 Wote, Jura wamp nimbᵾ, wᵾlᵾk rok, kona peng ei nga nombuⱡa ᵾldᵾ mbila ik kindᵾp wamp na, wamp wᵾlᵾ morung mbᵾ, andᵾk ruk tᵾk mou rorung. I etᵾk kᵾn, kona peng ila etᵾk ik pendᵾk puk, wu Jeison nga manga e, i tᵾk pok etᵾk, manga ambulk, Pol, Sailas raⱡ, ila pek moⱡᵾnggil ndam, imp moⱡᵾp tᵾpᵾn, mep ekit mbun wamp mbᵾ nguimin nᵾk etᵾng. 6 Ni wote, wu raⱡ, kandᵾk ti natᵾk, wu Jeison kᵾn mondpa pili wamp mat kᵾn, imp molk, kunt kundi mek puk, kona peng ei nga wu ou mbᵾ kᵾn mondᵾk, ronduⱡ wi rok, nᵾk mel, “Wu kᵾⱡ ndi, muⱡ uⱡ mbila pora, uⱡ kit mbᵾ etᵾk andᵾrmᵾn! Akup ya tᵾn nga kona peng ou ila oⱡina, wote wu Jeison ndi, wu kᵾⱡ tᵾpa, elim nga manga ila pendᵾm. Wu kᵾⱡ ndi, tᵾn nga Rom wu nuim mumuk Sisa ei nga nᵾtᵾm ik kᵾⱡ, rok akᵾk, wu king elpa ti morum, nᵾng ei nga mbi ei Jisas,” nᵾtᵾng. 8 Wote, ik kᵾⱡ mel nilingina, kona peng ila rᵾp wu na, wamp ok paⱡa petᵾng nimbᵾ orunga, ik ou ndupa, nᵾtᵾng. 9 Ei kᵾn, kona peng ila wu ou mbᵾ ndi, wu Jeison kᵾn mondpa pili wamp mbᵾ kᵾn, orunga ku moni mat ngangina kᵾn, wak rop mundmin nᵾtᵾng.

Pol Kᵾn Sailas Raⱡ, Beriya Kona Ila Orᵾnggil

10 Kona rumbᵾⱡ roⱡnga, Pol kᵾn Sailas mbᵾ raⱡ, mondpa pili wamp nimbᵾ ndi, tᵾk Beriya kona ila mundrung. Wote, kona ila ruk pukᵾⱡ kᵾn, Jura wamp mbᵾ nga atinga manga kel ila purᵾnggil. 11 Beriya kona ila Jura wamp petmin nimbᵾ, Tesalonaika kona ila Jura wamp nimbᵾ mel mon, wamp mbᵾ wamp kai. Ei nambuⱡ emel, wamp mbᵾ numan kun petᵾm wamp mbᵾ morung, Tesalonaika kona ila wamp mel mon. Wu raⱡ, ik nᵾtᵾnggil mbᵾ, kum tek, wote rumbᵾⱡ ui mbila rᵾk rᵾk, Pol nga ik nitim mbᵾ, kupa, muna kol nda nᵾk, Got nga Buk Wingti ila rorung ei mel kombulk, kᵾmp tᵾk kandrung. 12 Ei kᵾn, Jura wamp puⱡi kᵾn, wote kona ila Grik wu nuim mat nga ambᵾmᵾl mbᵾ kᵾn, Grik wu mat kᵾn, ik ei pilik mondᵾk pᵾtᵾng.

13 Wote Pol ndi, Beriya kona ila Got nga ik ei, nimba ngonum nᵾtᵾng ik ei, Tesalonaika kona ila Jura wu mbᵾ ndi, pilik kᵾn, Beriya kona puk, wamp mbᵾ kunt kan etᵾk ik pendᵾtᵾng. 14 I elingina, mondpa pili wamp ᵾngᵾnᵾl nimbᵾ ndi, Pol tᵾkrᵾk tᵾk, mek puk, num kuta ᵾldᵾ ila mundrung. Wote, Sailas kᵾn Timoti raⱡ, Beriya kona ila morᵾnggil. 15 Wote Pol mep, int nduimin nᵾk purung. Wu kᵾⱡ mek puk, Atins kona ila puk, wak rok yant orung. Ok kᵾn, Pol ndi, Sailas, Timoti raⱡ, elim kᵾn nundpa, akil tek wunggil nimba, rung mundrum ik nimbᵾ, kundᵾk nᵾtᵾng.

Pol, Atins Kona Ila, Got nga Ik Puⱡ Nimba Ngurum

16 Pol, Atins kona ila Sailas kᵾn, Timoti raⱡ nokundpa moⱡpa, kᵾndrᵾm mel, kona peng ou ila, kur atinga uⱡ ei nga, minal etᵾng ila kandpa, Pol ni munt mi titim. 17 Uⱡ ei kandpa kᵾn, atinga manga titim ila, Jura wamp na, wamp rᵾⱡaip elpa na mat, Got nga mbi paka rondᵾrmᵾn morung wamp nimbᵾ kᵾn, Got nga Rᵾnang Ik Kai mbᵾ, nimba ngurum. Wote rᵾnggilmᵾ mbila, wamp mou rok etmin kona mbila moⱡpa, elim nga ik kum ting orung mbᵾ, wamp mbᵾ, Rᵾnang Ik Kai mbᵾ, nimba ngurum ku. 18 Wote, kona ila nga, Epikuriyan kᵾn, Stowik uⱡ elpa raⱡ nga numan pep rok etmin ik mbo wu kat ndi, Pol nga ik nitim mbᵾ rok, akᵾk nᵾk mel, “Ik puⱡaka mat ninim mbᵾ, namba ik mat ninim nda?” nᵾtᵾng. Wote, wu mat ndi, nᵾk mel, “Muna kona elpa mat ila nga got mormin mbᵾ nga nᵾndnᵾm nda?” nᵾtᵾng. I nᵾtᵾng, ei nambuⱡ emel, Pol ndi, Jisas koⱡpa, wote ⱡoporpa omba purum nitim ik ei nga, pilik nᵾtᵾng. 19 Wote, Pol tᵾk mek puk, Eriyopokas mou rormin komnga mondᵾk, nᵾk mel, “Nim ik kont kat, wamp mbo rondᵾn mbᵾ, tᵾn nᵾkᵾn ngana, pilamin! 20 Tᵾn pili napᵾtmᵾn ik mat nilinga pᵾnmᵾn mbᵾ, na puⱡ mbᵾ nᵾkᵾn, mot ndana, pilamin!” nᵾtᵾng. 21 (Atins mᵾi puⱡ wamp mbᵾ kep, wote kona elpa mbila nga wamp ok, Atins pek mormin mbᵾ ndi kep, ik kont ti ruk orum, ei nga nᵾk, wote nᵾtmin mbila, kum tek iting mbᵾ nga numan ngormin).

22 Eriyopokas wu mou rok morung nila, Pol ndi, oⱡa anggilpa, nimba mel, “Enim Atins wamp mbᵾ, mbi paka rui uⱡ mbila ronduⱡ puk mormin. 23 Ei nambuⱡ emel, na enim nga kona peng ila andᵾp kant ei, enim nga mbi paka rormin kona mbᵾ nga kona tila mbo kᵾndᵾr ei, rat pol wingti ila mon kat rok, ‘Got pili napᵾtmᵾn ti nga kona ei,’ nᵾk rok mondrung. Enim ndi, Got pili napᵾtmᵾn ti kᵾn, mbi paka rormin nᵾtmin. Got ni kupa morum ei nga ik ei, enim kundᵾp namp pilᵾi!

24 Ya mᵾi ei kᵾn, mᵾi ei nga rukᵾr tetᵾm mbᵾ nga mim itim Got ei, muⱡ mᵾi raⱡ nga Nuim morum. Wote elim ndi, wamp nga manga wingti ou rakurmin mbila muⱡi nambrᵾm. 25 Muna Got mel ti monduⱡnga, wamp ti ndi, ngumba tᵾpa rupᵾndi napᵾndrᵾm mon. El elim ndi, tᵾn wamp mbᵾ orunga, kont mba mul uⱡ ei nga muⱡnga ei kᵾn, wote mel mbᵾ pora tᵾn ngorum. 26 Wu tenda ei nga mema ila, akup wamp mbo elpa elpa mbᵾ, mᵾi kᵾmp mbila pora, kaⱡᵾp tᵾpᵾn yant yant onmᵾn. Elim ndi, wamp mbᵾ nga ui pendpa, pek muⱡing kona mbi mbᵾ, kᵾmp tᵾpa elpa elpa ngurum. 27 I itim ei, ei nambuⱡ emel, wamp mbᵾ ndi, Got elim kuruk kandᵾk, teing nimba itim. Wote, i etᵾk kᵾn, elim ni, ruⱡ etpa morum nᵾmp pili nᵾpilmᵾn nimba itim. 28 Unt, wu ti ndi, nimba mel, ‘Elim nga ronduⱡ ila, kont mbun monmun, wote nombuⱡa andinmᵾn,’ nitim. Wote ti, en enim nga mon rormun wu mat ndi, nᵾk mel, ‘Tᵾn elim nga kangambuⱡa mbᵾ, ku nᵾtᵾm,’ nᵾtᵾng.

29 Ei kupa, tᵾn Got nga kangambuⱡa mbᵾ. Ei nga, tᵾn ndi pilpᵾn, Got ei, wamp nga ki raⱡ ndi, gol na, silpa na, ku na mbᵾ ndi, mim etmin mbᵾ, got nᵾmp pili nᵾpᵾlmᵾn. 30 Unt wamp uⱡ mbᵾ, pili napilik etᵾng ei, Got ndi, kandpa kui itim. Wote akup, Got ndi, ronduⱡ mundpa, wamp mbᵾ, orunga uⱡ kit mbᵾ, wak rok, numan ropᵾl reing nᵾtᵾm. 31 Elim ndi, to ropa pinditim ui ila, elim nga mbi ropa titim wu ei ndi, wamp mbᵾ orunga, en enim nga etmin uⱡ mbila, kun kᵾmp tᵾmba. Elim nga wu ei, pilpᵾn poⱡ ndupᵾn, itᵾmin nimba kᵾn, wu ei, on kona ila, ⱡoporpa tᵾpa mundrum,” nitim. 32 Ni kᵾn, Pol ndi, wamp on kona ila, ⱡoporpa omba purum nitim ik ei, wamp mat ndi, pilik tᵾk, ik kuldᵾtᵾng. Wote wamp mat ndi, Pol kundᵾk, nᵾk mel, “Nim nᵾn ik kᵾⱡ nga aldpa, tᵾn nᵾk ngui!” nᵾtᵾng. 33 Wote Pol ndi, mou rok morung kona ni, wak ropa kelpa purum. 34 Wamp mat, Pol nga ik nitim mbᵾ, pilik mondᵾk, pᵾtᵾng nimbᵾ ok, wote Pol kᵾn, kup etᵾng. Wamp kᵾⱡ nga ti, wu Daiyonaisiyas, wu ei Eriyopokas komnga ila kaunsil morum. Ti, amp ti mbi tek, Damaris nᵾtᵾng ei kᵾn, wamp mat kᵾn, pᵾi mondᵾk pᵾtᵾng ku.